اب تک اِس سیریز کی 49 قسطیں پوسٹ ہوچکی ہیں اور پچاسویں قسط تیار ہو رہی ہے شاید یہ آخری قسط ثابت ہو مگر میں نہیں چاہتا کہ اِن قسطوں کا اختتام ہوجائے ـ پچھلے چند مہینوں سے ملک در ملک ٹراولنگ، وقت، کاہلیت اور تھکاوٹ یہ سب اِن قسطوں کو آگے بڑھانے میں رکاوٹ بن رہی ہیں ـ دفتری کام اِتنا بڑھ گیا کہ چاہے ترکی میں رہوں یا فرانس میں مگر لگتا یہی ہیکہ اپنے دفتر میں ہوں گھومنے پھرنے کیلئے بھی وقت نہیں ـ فی الحال اپنے باس کے ساتھ ملک در ملک سفر میں ہوں مگر سیر سپاٹے کیلئے نہیں کمپنی کے کام سے ـ اب پچاسویں قسط لکھتے اتنی لمبی ہوگئی کہ سمجھ میں نہیں آ رہا کس بات پر اختتام کروں ـ

خدا کی اِن سیریز کو پڑھنے والوں میں اکثریت نے اسے صرف بکواس قرار دیدیا اسکے باوجود پھر بھی بلاگ کے اسٹیٹس کا کہنا ہے کہ اِن قسطوں کو آج بھی پابندی سے پڑھنے لوگ آ رہے ہیں اُن میں وہ بھی ہیں جنہوں نے اِن قسطوں کی شدید مخالفت کی تھی ـ اسکے علاوہ کئی احباب نے اِن قسطوں کو سراہا بھی اور باقاعدہ ای میل سے گذارش بھی ہوتی ہے کہ اِس بار کیا لکھا جائے ـ قسط نمبر 22 سے 49 تک یہ قسطیں ہندی میں بھی ایکساتھ پوسٹ ہوتی رہیں جہاں سبھی ہندی بلاگران نے اسے سب سے زیادہ سراہا ـ یہ کوشش بھی جاری تھی کہ اِن قسطوں کا انگریزی ترجمہ بھی ہو مگر وہ کام بھی اب ٹھپ ہوتا نظر آ رہا ہے ـ کوشش رہے گی کہ اِن قسطوں کو جاری رکھا جائے شاید کہ درمیان میں لمبا وقفہ ہو ـ پچاسویں قسط ضرورت سے زیادہ لمبی ہوچکی اب اِس کو دوبارہ پڑھ کر پوسٹ کرنے کے قابل بنانا ہے اگر وقت ملے تو ـ
خدا کی پچاسویں قسط کا انتظار ہے!

BANGALORE - NOW - BANGALOORU

بھارت میں بمبئی، کلکتہ، مدراس جیسے بڑے شہروں کے نام بدلکر ممبئی، کولکتہ، چنئی بنانے کے بعد اب یکم نومبر 2006 سے ہمارا شہر بنگلور کی بجائے بنگلورو کہلانے لگا ـ

چونکہ “ممبئی، کولکتہ، چنئی اور بنگلورو” یہ سارے شہر انگریزوں کی آمد سے قبل اِنہی ناموں سے جانے جاتے تھے، اور پھر انگریز آئے تو اپنی موٹی زبان سے ممبئی کو بمبئی، کولکتہ کو کلکتہ، چنئی کو مدراس اور بنگلورو کو بنگلور مشہور کر چلے گئے ـ پچاس سالوں بعد بھارت میں جو بھی سرکار بنی، اگر کسی دن کرنے کو کچھ کام نہ رہا تو شہروں کو اُنکے پرانے نام دلواکر ایک کارنامہ سمجھ رہے ہیں ـ

ویسے تو انگریزوں کے دیئے گئے ناموں کو فیشن سمجھا جاتا ہے، سرکار کا کہنا ہے جب بھارت سے انگریزوں کا دور چلا گیا تو اب اُنکے دیئے ہوئے ناموں کو بھی مٹانا ضروری ہے اور وہ بھی پچاس سالوں بعد؟

بنگلور شہر کا نام بدلنے سے صرف بھارت ہی نہیں بلکہ دنیا بھر کی مختلف انڈسٹریوں کو زبردست نقصان پہنچا ہے ـ آج بنگلورو ایک بہت بڑی کمپیوٹر انڈسٹری ہے، دنیا بھر کی مشہور کمپنیاں اِس شہر کو انفارمیشن ٹیکنالوجی کا گڑھ سمجھتی ہیں ـ فیشن ٹیکنالوجی سے لیکر کمپیوٹرس اور سافٹویئرس کی ہزاروں کمپنیاں اِس نقصان میں شامل ہیں ـ سبھی کمپنیوں کو اپنا برانڈ امیج بدلنا ہے، وزیٹنگ کارڈس اور سائن بورڈس وغیرہ سے بنگلور ہٹاکر بنگلورو لکھنا ہے ـ کسی بھی عالمی شہرت یافتہ شہر کا نام بدلنا آسان کام نہیں جس پر خود سرکار کو بھی کروڑوں کا نقصان ہے جو کہ عوام کا پیسہ ہے! کریں تو کیا کریں اِس نام بدلنے پر احتجاج بھی نہیں کرسکتے کیونکہ سرکار نے تو انگریزوں کے دیئے گئے نام بدلیں ہیں ـ اِس خواہمخواہ کی نام بدلی پر جو نقصان ہوتا ہے، اُس پر کیوں نہیں سوچتے؟ اب صرف یہی ماننا پڑے گا کہ جب ہماری سرکار کولکتہ، چنئی اور ممبئی کا نقصان برداشت کرسکتی ہے تو اب بنگلورو بھی، آخر عوام کا پیسہ ہے!!